冇諗過,從來冇諗過陪我家姐過門會發現我家姐以為要住既地方係咁不堪,試問一間滿佈雜物,步步難行,陣陣異味既屋,點可以住人....講真我真係接受唔到...已經要搬入長洲咁遠仲要係垃圾堆生活...唔使咁慘呀...係為左面子要將婚禮搞得好好睇睇搞到冇錢出外租屋,定係真係咁鐘意係垃圾堆中生活,就算係點解要我家姐咁同你捱呀......

心情真係太差喇,仲為左阿爸同阿媽收左擺酒既人情已鬧交,其實我都唔想同倆老嘈,只不過各執一詞,其實好想搵人傾下架,每當心情差就會打俾佢...我相信只有佢先可以幫助我,就算幫唔到佢地會令我開心番,不過自分手後佢一年只會接我一次電話,大多數佢都唔會接聽,不過今次佢有聽到,從電話內傳出熟悉既聲音,但態度就變得好陌生,不過佢每次都好關心我既感情狀況,而我今次講左真心說話俾佢知...唔知佢會唔會同樣有心痛感覺,其實只有佢我先可以放心講哂心內一切唔開心既事,而佢每次都俾時間我去講,去鬧,不過係唔准我喊,佢一聽到我喊就會轉話題令我笑番,其實過左咁多年我真係好真心咁同佢講左對唔住,以往太多任性行為,可能令佢唔開心,一句對唔住真係欠佢,講完後佢竟然同我講我冇欠佢一切,佢好記得佢問過我借錢,其實佢一早還哂,仲問我係味未還俾我,定係又想俾錢我洗....雖然唔知佢邊句真邊句假,我只知佢最清楚我心諗咩...原來到lee刻佢仲肯幫我還錢,仲會擔心我生活....可惜...可惜既係我真係唔知佢諗咩,可能一年一次電話lee種關係對大家係最好既...好想佢怏d結婚生仔,我知佢都係咁諗....可惜我太難搵到個對我咁好,咁了解我既人,可能真係要下一世先會再搵到...唔係想佢內疚,只係我心內既想法,相信再聯絡到就係下一年.....

其實係傾談中,發覺佢仲好記得我鐘意既明星,時物...同埋以往開心回憶,其實忘記到大家唔開心既以往係好事,但好可惜時間唔可以倒轉...可能只有回憶先係最美好....我知你對誠諾同我睇sammi演唱會,會send email俾我係唔會對現,不過果刻已經好開心,多謝您阿傑~

講起叮叮車,我都幾享受係晚上車速飛怏涼風飄飄既感覺,係叮叮車上我會注視不同既沿人同店鋪,會發覺好多好多有趣事件...不過係叮叮車上,迫迫地又冇冷氣真係同其他既交通工具好唔同....

lee排聽到身邊既朋友係工作上都會有改變,唔係被炒就係自己轉工,雖然唔係個個都能轉到份人工同環境理想既工,但我覺得係時世不境氣既環境可以搵到份做得開心既工已經好好,仲要搵到份薪高厚職既工真係難上加難...如果俾我再簡,可能....可能我都會唔想辛苦....做野開心,人工夠用已經算數....平淡就平淡啦....老喇太刺激既野十年前就應該做宜家先開始太遲了吧....可能你會話我唔上進,唔努力....但我心知心足就夠喇....起碼我叫試過改變...

由於玩夜場,同人太多關係只能玩得5個game...最長要排成個鐘先有得玩...講驚真係唔及我坐纜車咁驚(可能我畏高),不過我嗌到第日喉都沙埋...真係好刺激呀...哈哈~

今次真係冇一早預計咁入去玩,雖然一行有8人,不過大家都唔係太熟悉所以都係各有各玩多....今次有我同阿妹同我朋友同佢個妹,仲有我另一個朋友同佢既朋友....本身以為我朋友佢會帶同男朋友出席,但估唔到呀男朋友就帶同另一位女性朋友出席....真係場面古怪...不過我一於好小理,入得去玩梗係要玩得開心啦....其實係得第一個game係大家一齊玩之後呀男朋友就同佢另一位女性朋友去另玩另外既....起初我同阿妹都係同男朋友同行既,之後都係唔好阻人拍拖喇..唯有返去join返我既朋友們....不過我個朋友仲唔知情識趣係咁打電話俾呀男朋友,成日問人係邊....好心啦連我阿妹都明人地係被開你,佢仲未明白,雖然我唔知佢同呀男朋友有幾親密,就當日睇佢2個都係好普通既朋友關係...可能係錯覺,可能係小結交朋友,無論如何都希望佢唔好太傷心,做人唔好太自以為事應多聴別人意見...得閒見多d人...

男人最鐘意講過就算,女人應該學識聽完就算...何必當真呀~

男人最鐘意說出美麗謊言,女人應該學識聽謊言...何必認真呀~

男人最鐘意聽教聽話既女人.女人應該學識做個聽教聽話既小鳥~

只要你明白道理,先有資格學人玩遊戲...否則你都係做返個普通人循規蹈矩吧 別心野野....

當然獎罰要分明啦,男人太就又係唔得既,太放鬆佢地又會身痕....要佢乖乖都唔係咁易......

可能我睇得太通喇知道要搵個好男人太難,太難...由我隨遇而安,唔好再迫我喇...就算我係迷失也許都有清醒時候...正所謂****別人笑我太瘋癲,我笑他人看不穿****~~~~~

整裝待發,各人精精神神出發去註冊處,因為預早到註冊處所以大家都有時間影下相....不過果日都幾熱下...一路影相一路出汗....,都幾辛苦~~

第一次見到家姐著婚紗,感覺佢大個女喇....哈哈....不過佢個妝就勁左小小....希望到擺酒果日佢更加靚,更加索啦....今次大家都有采排經驗,到擺酒時候大家應該冇咁緊張,笑得更開心....原來呢讀誓詞既時候真係好緊張架,,,,雖然我只係拍movid都感覺到自己心卜卜跳,何況係2位主角,讀到甩甩卡卡....都幾搞笑既....其實我覺得最可惜既係冇請到攝影機,搞到要自己影相...所以氣氛都差左小小,,,,希望擺酒果日更加更加好....

第一次著one pice,著住對2吋半既鞋成大半日,真係好辛苦呀,終於到換衫既時候,嘩好似解脫一樣....著返波鞋對腳真係好舒服...換左條裙成個人都輕鬆哂....一鬆懈個人就肚餓....去到酒樓食飯更加覺得d野好好食,可能係餓既關係啦.....唔知擺酒果日會點呢,,,應該仲更加辛苦....冇計啦,始終都係開心事....我都會盡心盡力既....

除左咖啡另一樣令我上癮既就係零食...lee樣野我真係點戒都戒唔到,因為冇任何野可以代替佢,係我做野好攰好攰既時侯,最享受既係可以靜靜地食零食既時刻,係心情唔好零食更加可以係主角,不過零食既癮俾咖啡細...一個月食一次倆次已經足夠....

年紀大喇,睇既野都唔同喇,以前會覺得自己仲後生有本錢,食得太多唔健康既食物,係時候要節制下,唔係三十未到俾人以為係師奶幾唔好呢....lee排日日收工經過中環都見到有人影婚紛相,比著前幾年既我,我會好羨慕,但宜家開始有點反感,同見到bb一樣,以前我都會好似同事嗡會好主動同bb玩,仲會玩得好開心,宜家開始對bb有反感,尤其係bb喊聲.......唔通我對結婚,bb有恐懼症...

雖然現在既公司人工唔高,但公司既工作量係同人工係對等既...點解我咁講呢,係有事實既根據,因為唱完通宵k訓得3個鐘照返工,一d問題都冇,又冇做錯過,起初第一個星期已經覺得好舒服,冇咩辛苦既感覺,到第二個星期要調去金鐘發覺仲舒服,因為淨係忙lunch time,一過左3點可以講係悶....仲要可以放星期六,日真係估到估唔到,起初為左快d搵到工先見lee份工,估唔到入到一間好憂遊既工...最令我驚訝既係公司福食,4-6個人食竟然可以有蝦,有蟶子,有湯有糖水...有時會有燒味,有豉油雞,燒鵝,叉燒,分蹄,真係有菜有肉...間中仲有pizza,burger king,真係食到人到癲....唔知之後會唔會再有咁好既福食,其實我已經好心滿意足,仲有公司有唔錯咖啡,我又搵到好飲既咖啡....

講開烈火我最心刻既係王喜想自殺既片段,果一刻令我回憶到.....雖然已經過去喇...不過好打動我,身同感受既情節~可能真係唔係咁多朋友知道,或者相信,我就好似王喜講既一樣,只係一步,就係差一步,果一刻個腦完全冇第樣念頭...只有想放棄...同朋友講返佢地都同樣講你咁硬朗開心,唔似會做傻事既人,講真...我心諗咩有時自己都搞不清楚,何況外人呢,不過回頭再睇,就知係好傻...我永遠會記得當時將我係死亡邊緣接我返嚟既人,亦都好多謝我以前男朋友,唔係佢我永遠唔識長大,唔係佢我唔會學到自立堅強,雖然獨撐係艱辛,但我學識快樂自尋...每當唔遇到唔開心我會食鐘意食既野,聽鐘意聽既歌,遇壓力我會去打boxing出下汗焗下蒸汽浴,每當我想依偎既時間我會試試去搵"你"...知道"你"未必係大家既唯一,但我已經好滿足相處既時候,雖然未知關係可以維繫幾耐,始終我都怕失去所以唔想再問,只知上次見面發覺你有唔捨得既感覺,唔知係好定係唔好...我真係好想有一日你可以堂堂正正咁同大家見面...我再唔想受到我阿媽迫去相睇既壓力.....

無論工作同感情都係,有得選擇比較,先知邊樣先適合自己,原來我係鐘意輕輕鬆鬆冇壓迫感冇壓力既感覺,嘗試做文職發覺自己唔可以坐足一日係一個空間,嘗試識有學識有財力既朋友,發覺同樣都有壓迫感好辛苦....

原來最好已經係身邊,何必再搵....如果lee句說話係佢講既係幾好呢....發返個好夢先~~~~

或者係太耐冇見喇,我一心以為大家已經都有改變,原來我只係個小朋友,容易開心又容易唔開心...其實都係我唔好,又貪心又貪玩....原本我好想同佢講一句"不如不見....."但始終我都冇lee份勇氣,同唔捨得,真係唔捨得一份似有還無既感覺...係我最唔開心既時候,只有佢一個人俾到我安全既感覺我,靜靜的坐係身邊...俾到一個寧靜既被難所我....雖然佢幫唔到我解決問題,但我就係要咁簡單既一份感覺....

唔通真心就真係唔介意一切,其實但我仲未去到果個階段,我亦因為引誘做錯過,有過動搖...我真係好想講出嚟,但我知講左就唔會再有以後,或者佢根本唔介意我做過既野,我何必講出嚟影響大家關係....都係你瞞我瞞好.....咁至開心~

心內一直掙扎,但一直堅信自己一定要試,成功與否未必係好重要,起碼我試過,我冇放棄我自己,一直都想30歲轉行,冇諗過咁快有機會俾我接觸到旅遊lee 行,知道前路漫長,為自己,為將來我會挨,要做出成績,令白眼我既人知道,只有有恆心係真係可以成功,要堅持信念,幾多歲轉行都係可以,挨得過想放棄既心,就會有成功既感動~

由於今次係第一次見旅行社所以見工前已經好緊張,一直練習打字,練習電腦技巧,到面試當日都十分緊張,好彩遇到個好既面試官,都好多謝佢俾個機會我去接觸lee 行,講真如果今次面試我係唔成功既,可能我想放棄既心就真係大過我堅持既心,人工對於我嚟講真係唔太重要,有機會先係最重要,除非真係好唔合適做唔係我諗我都會做一段長時間,因為我想要既係一份遇興趣於工作既工,我知萬事起頭難,希望我能堅持到底,雖然可能要做多份past time先夠生活,但我真係好感激一直支持我既朋友,真心支持對於我真係好緊要,無你地既支持,我唔會有成功既感動,原來夢想成真既感覺真係好激動.....得到lee份工俾起以往既工作真係感覺好唔到,以往係為生活,為唔想俾屋企人煩,就會士旦搵份工,就lee個心態一做就差不多十年飲食,到有一日覺得係時候要改變,不可能一世做飲食,就決心轉型,係lee半年一直都忍耐屋企人既唔支持,活在唔開心既壓力下,真係好辛苦,現在機會已經係我面前我一定會把握~

真係好多謝係我情緒最低落既時候得到既鼓勵,係我最需要搵人傾計既時候你都不厭其煩係到聆聽,真係感受好大......

煩惱確實係自尋,己人憂天既性格令我常常把事情簡單複雜化,感情累事既我,令我未能放開心懷去做事,情勢都係太易收別人影響,真係要學習放下...懼怕要學一輩子我都未學完~

事情已經發生了,無謂再去諗對與錯,可能係對,也可能係錯,就算係錯都改變唔到事實,唯有寬容去面對之後會發生既事,係我一直執著係自己既錯令自己苦惱,今天我明白錯係大家都有,所以無謂將事情看得太重...未來既事我無可能知,但眼前既事我會努力,唔可能再俾人睇唁起..我既鬥志返嚟喇......

前日去見一份侍應真的估唔到會有80人去爭一份7千幾蚊既工...市道真係咁差....我見咁多次工都未試過會咁恐怖...個面試人員可能真係太累喇,見到第50個到我喇...佢一副黑口黑面既樣子令我再次討厭lee 間所謂既大集團...唉人浮於事,我都唔想打擾你,為何一見面就擺出一副極唔滿意既樣子,香港人真係壓力太大,累了吧...將人慈笑臉,耐性一一都失去......

今次整既係紅豆燒餅,其實整左好耐,不過一直都唔記得post上嚟,

整法超易,只要用粘米粉加水搓成粉團加入紅豆蓉,再煎到金黃色就成功喇....

其實之後都整過好幾次既作品可惜係失敗既所以冇post上嚟,有電飯煲焗蛋糕,都整左2次,第2次加左玉桂粉同香蕉,味道好好呀,可惜蛋糕都係發唔起,好似pie咁...仲有整過芒果紅豆糯米糍,味道ok可惜賣相麻麻.....到下次要整既係...好想試下mossee cake...希望會成功....

最近lee個星期,好奇怪,不約而同都有朋友約外出食飯,本身都懷著開心既心情去準備,可惜一個二個都係失約....唉..有冇咁岩先,一係唔約,一係全部失約,唉心淡喇.....究竟係我太易約定係係知失約我都唔會有什麼不滿,啍....過份呀.....心地好不代表無脾氣,有些人我會原諒,因為利益關係,唔見面可能俾見面還要好,幻想同現實永遠都係2回事,我從不會將金錢放係感情中...如果你要既係金錢,我幫不上忙,你要既感情或許我有小小,希望我真係等到你請我食翅既一日,就算係碗仔翅我都開心,起碼知係真心....

至於朋友失約我就會好唔開心,可能相信既關係,我已相信為何為反口,為以示我不滿,除非必要,唔係我唔會再約lee 類人.....我都需要被重視既,唔係要來便來~時間多唔表示我可以浪費,唔好利用我既時間同好奇心......我會好反感~

唉連一個失蹤多時既人都突然出現....約左之後又突然出唔到嚟.....係咪我錯左d咩呀,咁玩我呀.....佢地大家都唔識對方冇可能夾埋一齊快我飛機架.......天呀.....夠喇..唔好再玩我好無,我唔受得幾多刺激架喇........

有工返仲係唔開心..仲係有怪怪既感覺....可能同人工有直接關係....唉鬼叫我窮唯有做住先....可能間野係新開,可能間野人工唔高請唔到人所以叫我返工,好希望做住先再搵旅遊既工,或者等學校介紹...

做返侍應始終係最易搵既工,一見就請左...如果我去見旅遊既工都係咁就好喇.....聽個阿sir講信成會請人,點解咁耐都唔叫我去見工架,定係我真係唔past 冇工介紹.....唉....

人生就係咁,冇得選擇既時候你會埋怨,有得選擇既時間侯你會難做決定...時間對我嚟講已經變成重要,再沒幾多時間去實現搵份理想既工,更難去尋找夢想既咖啡店,去尋找世界各地...太多事情想做,可惜唔係想做就可以去做,現實真係現實,草根就係草根,怎可能將草根變成人參咁珍貴.....

一個月時間聽得好多故事,有感人既分享,有精彩既旅遊人生,真的好羨慕好羨慕別人能夠自由自在可以成日去唔到地方旅遊,體驗生 活,我諗我就算活到50歲都未能去得到半個地球...我想唯有做旅遊業先可以咁快環遊世界.....

 畢業等於失業???對我lee個長期處於搵工狀況既人嚟講分別不大,03年因為經濟唔好加上自己冇咩技能就去讀一個餐飲課程,畢業後搵既工都唔係學校介紹既,都係靠自己搵既,雖然唔係十分理想既工作,但起碼都夠養活自己,經過幾年行屍走肉既生活,決定要搵長遠既目標......09年又係經濟不境既時世,去讀一個旅遊既課程,係好多人眼中係不切實際,係浪費時間,但我自己眼中係一個轉行既踏步板,成功與否都起碼嘗試過,經過一個多月既腦力練習,辛苦學習,將從未接觸既事物一一要牢記在腦,確實唔易,雖然成績表未出,但我覺得自己已經成功,因為我已經吸收到好多,對旅遊業已經有認識,知道自己既興趣,可惜人浮於事,要搵旅遊業既工真係好難...~

眼前最急切既係搵工所以我唯有取易不取難,搵返老本行,今次去一間幾咁心水既餐廳見工,雖然未知結果,但我最覺搞笑既係佢問我讀完旅遊顧問點解唔搵有關既工,唔會覺得哂咩...我答得都幾搞笑,我當然冇同佢講時世唔好搵到咩做咩啦,我同佢講讀左既野永遠都唔會哂既,梗有一日會有用,眼前我確係需要一份工(心想)~同埋講左個傻婆大鬧迎新都會既事俾佢聽...唔知佢會唔會嚇親??希望我成功返到工啦....又希望學校有理想既工介紹俾我,咁我先可以達成轉行既目標,將旅遊lee行做未來發展既方向...講得好偉大,我怕自己冇能力...